صدى صوت

آخر ما سأقول بخصوص مصر والجزائر

على مدار ما يقارب الشهر والحرب شغالة بين مصر والجزائر ، ومع ذلك العملية كل يوم في تزايد مستمر من الجانبين ، ومتهيألي ان مفيش حد من الطرفين له عين يشتككي او يقول عايز حقي لأن كلا الفريقين قاموا بالأفعال وبردود الأفعال على ما فعلوه ..

الضرب بالضرب

السب بالسب

حرق العلم بحرق العلم

فيديوهات مقابل فيديوهات

رسائل تعصب وكراهية مقابل رسائل تعصب وكراهية

ناقص ايه تاني ؟؟

شركة اوراسكم وفلوس نجيب سويرس ؟ وكدة كدة هاتيجي بالزوق بالعافية هاتيجي اقل ما فيها رفع قضية بالمحافل الدولية وسترد له امواله وفوقها بوسة ..

طيب ايه اللي حصل ؟؟ ناس اتقطع عيشها هنا وهناك ناس كانو شغالين وبياكلو عيش فجأة ده لقى نفسه عدو في بلد التاني وبينضرب والتاني نفس الحكاية لقى نفسه عدو في بلد التاني والإتنين قرروا انهم يسيبوا اشغالهم واكل عيشهم خوفاً على حياتهم ؟

طيب ناقص ايه تاني ؟

ناقص آل الحكم في البلدين هما هما في اماكنهم متغيروش ولا حد فيهم اتهز اللهم إلا بعض التصريحات الخايبة من الطرفين لإمتصاص غضب شعوبهم ومن اجل تحقيق مكاسب شخصية لهم وحصل !!

طيب ناقص ايه تاني

ناقص مشاكل البلدين

الفقر اللي في الجزائر هو الفقر اللي في الجزائر .. والفقر اللي في مصر هو الفقر اللي في مصر

البطالة اللي في الجزائر هي هي البطالة اللي في الجزائر .. والبطالة اللي في مصر هي البطالة اللي في مصر

تدهور التعليم اللي في مصر هو تدهور التعليم اللي في مصر .. وتدهور التعليم اللي في الجزائر هو تدهور التعليم اللي في الجزائر

في الجزائر شباب بتموت وهي راكبة مركب بيغرق بيهم وهما رايحين اوربا .. وفي مصر شباب بيموتو وهما رايحين اوربا برضه والإتنين مقصدهم اكل العيش والبحث عن حياة افضل

حكم العسكر اللي في الجزائر هو هو في مكانه .. وحكم العسكر اللي في مصر هو هو في مكانه برضه

نفس المعناة اللي كان بيعانيها الجزائريين قبل الماتش هي هي نفس المعاناة اللي الجزائريين بيعانوها بعد الماتش .. وفي مصر نفس معاناتنا في مصر قبل الماتش هي هي نفس المعاناة اللي بنعانيها بعد الماتش .. سبحاناك يارب !!

طيب ايه اتغير في حياتنا للأحسن ؟؟ مفيش هي هي مصر وهي هي الجزائر مزدناش حاجة غير اعلان مشاعر الكراهية من الطرفين اللي الله اعلم جديدة ولا قديمة ولا ايه بالظبط ؟

طيب فيه ايه طيب اتعدل حالنا وحياتنا ؟؟ مفيش حاجة خالص هو هو الحال من 30 يوم من 60 يوم من 120 يوم من 180 يوم من اكتر من 25 سنة وحالنا هو هو وبيتنقل من اسوأ لأسوأ !! طيب وبعدين يا جماعة تفتكروا معركتنا دي استفدنا منها بشيئ ؟؟ اكيد لأ لأنها قطعت ارزاق ناس منا ومنهم هنا وهناك برة وجوا

طيب هل حررنا فلسطين ولا حررنا المسجد الأقصى ولا فكينا الحصار عن غزة ؟؟

لا الجزائر حررت فلسطين ولا حررت المسجد الأقصى ولا فكت الحصار عن غزة !!

كذلك مصر لا حررت فلسطين ولا حررت المسجد الأقصى ولا فكت الحصار عن غزة !!

امال فيه ايه يا جماعة ؟؟ كرامتنا يا استاذ اللي اتهانت

كرامتنا ؟؟ طيب ما احنا اخدنا حقنا بدراعنا وردينا على كل اللي عملوه وكمان فلوس عم نجيب سويرس هاترجعله تاني اما بالزوق او عن طريق المحكمة !! ، ويارب يعملنا بيهم حاجة تعوض الناس اللي اتشردوا كضحايا للي بيحصل ده .

طيب فيه ايه وناقص ايه والنتيجة ايه ؟؟

الإجابة وبكل بساطة مش باقي غير مشالكنا اللي بناعني منها بسبب ووجود انظمة وحكومات مهمتها الاولى والأخيرة هو انها ازاي تمص دمنا وتهين كرامتنا وتبيح دمنا حتى ، بس اهم حاجة سيادته واصحاب سيادته وابن سيادته واصحاب ابن سيادته ومرات سيداته واصحاب مرات ابن سيداته وده في مصر او في الجزائر الحال من بعضه !!..

ناقص ايه تاني ؟ ناقص ان هاني سرور واخته وشركتهم هربوا بعد ما اتحكم عليهم في قضية اكياس الدم الفاسدة بـ3 سنين اليومين اللي فاتوا ، ماهي هوجة ومحدش واخد باله !!

ناقص ايه تاني ؟؟ ناقص ممدوح اسماعيل اللي لسة هربان برة في لندن واللي غرق في عبارته اكتر من 1000 بني آدم وبرضه معظمهم او كلهم مصريين !!

ناقص ايه تاني ؟؟ ناقص اننا لسة برضه بنشرب مية الصرف الصحي وبناكل الخضار المسرطن وبنتعذب في الأقسام زي ما احنا !!

كلامي مكرر صح ؟؟ حتى الكلام نفسه مكرر لأن اللي بنام فيه بنقوم فيه لدرجة اننا بقينا بنأقلم نفسنا على البلاوي ، الواحد مننا بدل ما يعترض على تعذيبه في القسم بيتحمل ويجامل الباشا ويبقى مداس في رجله عشان ميغضبش عليه ، وبنتغلب على الفقر بإننا نمسك على بطننا ولو بناكل 3 طقات ناكل طقة واحدة كفاية حتى الاكل الكتير يعمل تخمة ..

اسئلتي الرخمة بتاع نهاية كل تدوينة متعلقة بالموضوع ده :

لحد امتى هانفضل كدة وامتى هانفوق بقى ؟

ولحد امتى هانفضل غفلانين عن اسباب مصيبتنا ووكستنا وتدهور حالنا ؟

ولحد امتى هانفضل نشتم في الجزائر اللي بعيدة عننا آلاف الكيلو مترات وهانسيب اللي ساكنين بينا وبينهشوا في لحمنا ؟

كفاية بقى .. اخدنا حقنا العين بالعين والسن بالسن والحرق بالحرق والسب بالسب

هانفوق لمصر امتى ؟ ها

وزي ما فوقنا لكرامة مصر مرة واحدة كدة هانفوق لكرامة مصر الحقيقية امتى ؟

فيه ايه ناقص تاني لسة متعملش بينا وبين الجزائر ؟ عشان لو نسيينه نعمله ونخلص بقى ؟

حرب ؟؟ مينفعش

طيب انا عايز ايه من خلاصة الرغي والكلام اللي انا عمال ادشه من الصبح ده ؟

عايز اقول بقى ان كفاية كدة المولد خلص

بح يا بابا ويا اماما ويا أخ ويا أخت ، بقينا فرجة العالم وكل طرف فينا عمل ما بداله من اجل تشويه الآخر ولم يبقى الا همومنا الأصلية

واللي ياريت وياريت ويارب يارب نفتكرها بقى ونلتفتلها

ونشتغل عليها بنفس النشاط اللي اشتغلنا عليه في موضوع الجزائر ومصر

وكل واحد او كل فئة تقسم جدولها زي ما هي شايفة ، لكن تحط في دمااغها حاجة اسمها أولويات وان أهم أولوية مصر وحالنا كمصريين

بالنسبة لأمثالي فعندنا يوم الإتنين الجاي الموافق 23 نوفمبر الساعة 2 الضهر في ميدان التحرير احتجاجاً على زيارة مجرم الحرب الصهيوني ( الرئيس الإسرائيلي يعني ) شيمون بيريز لمصر ..

وكمان عندنا حاجات اهم هاننفع بيها مصر وهاتفيد في مسألة التغيير عشان يبقى لينا كرامة محدش يقدر يدوس عليها بعد كدة ونقدر ناخد حقنا من عين التخين او بوء الأسد حتى

ياترى بقى انتو عندكو ايه في جدولكم ، ولا هاتستمروا في الهوجة ؟؟

كرامة المواطن المصري واسئلة تنتظر اجابات ؟

في البداية أرفض تماماً الإعتداءات التي وقعت على المشجعين المصريين في الجزائر ولن اقول على الشعب المصري لأن ببساطة الشعب المصري لا يملك ثمن تذكرة المباراة في السودان او تذكرة الطيران لا ذهاباً ولا إياباً يعني اللي راح مجموعة من المشجعين من "كِريمة المجتمع " اللي فوق ومش بيعانوا معاناة الناس ولا بيركبوا حتى مواصلات الناس ، ومع ذلك أرفض الإعتداء عليهم كما حدث في السودان على يد بعض فرق التشجيع الجزائرية ، وأطالب بمعاقبة المجرمين من الطرفين سواء من قام بالإعتداء المباشر ، أو من قاموا وشاركوا بالتسخين والترويج الشائعات والكذب من أجل تأجيج هذة الفتنة سواء من الطرف الجزائري او من الطرف المصري لكن في نفس الوقت لا أدعوا للكراهية لكني بكل وضوح أطالب بمعاقبة المجرم دون الدعوات للكراهية ، ومش صح أبداً إننا نعالج التعصب بتعصب وليس من شيم العقلاء ان نعالج تعصب بتعصب تحت أي مسمى ، وحبيت ابدأ بالكلام ده عشان محدش يقول اني بغض النظر عن اي اساءة او تعدي بحجة القومية او غيرها ، بل بكل وضوح وأكرر أطالب بمعاقبة المجرم من الطرفين- المصري والجزائري – ممن شارك بالإعتداء المباشر او بالتحريض والتسخين وترويج الشائعات من أجل تأجيج الفتنة .. ندخل في الجد بقى ..

دلوقتي نبرة الحديث عن الكرامة عليت اوي وبقينا بنسمع كرامة المواطن المصري وكرامة المصريين إلخ إلخ من هذا المصطلح الحق المراد به باطل ، أولاً وقبل أي شيئ لابد من توضيح حاجة مهمة جداً وهي ان اللي سافر يشجع المنتخب في الجزائر هم صفوة المجتمع المصري – من حيث الغنى – وزي ما سمعنا كلنا قبل المباراة لما الحزب الوطني أعلن عن تحمله نفقات السفر لـ2000 مشجع من مشجعين الحزب الوطني – المنتمين للحزب الوطني – ده بخلاف عدد من القيادات الحزبية للحزب الوطني وعلى رأسهم جمال مبارك وعلاء مبارك ، بخلاف عدد من الفنانين والشخصيات الرياضية ، وعدد قليل من المصريين المقتدرين اللي قدروا يتحملوا كلفة الرحلة على نفقتهم الخاصة ، يعني خلاصة الخليط ده كله صفوة المجتمع هما فقط وبقول فقط اللي راحوا يشجعوا المنتخب في السودان ، لأن ببساطة المواطن المصري – الحقيقي – لا يستطيع تحمل تكلفة الرحلة والتي وصلت في عرض شركة مصر للطيران للفرد الواحد (2500 جنيه شاملة تذكرة الطائرة والضرائب وتذكرة المباراة والانتقال من المطار إلي الإستاد والعودة ) بحسب موقع يالا كورة ، وطبعاً مفيش مواطن مصري من المنتميين لمعظم افراد الشعب المصري يستطيع تحمل تكلفة هذة الرحلة ، لأن في أغلب الأحوال أجدع موظف مصري بيقبض 1500 جنيه وده ان حد وصل للرقم ده أساساً ..

طيب يبقى ايه بقى حكاية الإعتداء على كرامة المواطن المصري في السودان دي ؟؟

الحكاية بإختصار شديد جداً هي الإعتداء على " كِريمة المجتمع المصري " او في قول آخر " الكريم شانتيه بتاع المجتمع المصري " الناس اللي معاها كل حاجة السلطة والفلوس والإعلام والنفوذ وكل حاجة ، وعشان كدة قامت الدنيا ومقعدتش ماهو على رأي المثل اللي له ضهر مينضربش على بطنه فما بالك لو كان اللي انضرب هو الضهر نفسه ، فهم أصحاب كل المميزات كما قلنا من اعلام لفلوس لسلطة لنفوذ كله كله ، فلازم طبعاً يبقى دول كرامة المصري ماهما دول أغلى الجثث واللي راكبين على كل حاجة في البلد ..

اما عن كرامة المواطن المصري الحقيقي فأحدثكم عنها ..

المواطن المصري الحقيقي هو من كان يسكن بالدويقة وانهارت فوق دماغه الصخور واتفعصوا تحتها واتقال عليهم ان دول شوية بلطجية وحرامية وبتوع مخدرات وكأن ده مبرر لبيعهم وان محدش يسأل فيهم وتم دفن جثث معظمهم تحت ركام الصخور ، واللي عاش منهم لحد دلوقتي متلطمين بين الشارع والحكومة منهم اللي قدر ياخد جحر بيتقال عليه شقة من الحكومة ومنهم اللي لسة مرمي في الشارع لحد الآن وفيهم ستات وبنات يعني شرف معروض للنهش في أي لحظة ومع ذلك محدش اتحرك ليهم ، ليييه ؟؟ عشان زي ما قولنا اتقال عليهم بتوع مخدرات وبلطجية وعشان فقرا مش من كريمة المجتمع ..

المواطن المصري الحقيقي اللي بيركب المواصلات وبيطلع عنين اللي خلفوه في الزحمة ( واللي عمر ما واحد من اللي راحو السودان ركب زيها ، ماهو صحيح اللي هايدفعه 2500 جنيه في كام ساعة هايتفرج فيهم على ماتش هل هايركب مواصلة بجنيه ولا بنص جنيه من بتاع الناس الغلابة ؟ ) ، وطبعاً في المواصلات بتاعتنا دي بيبقى فيها قمة الإهانة سواء زحمة وتكبيس في الناس وكأنهم مجموعة اسماك سلامون محشورين في علبة سلامون ، او دعك وتحسيس وتحرش بالبنات اللي راكبين وسط الزحمة او حتى الأمهات، او تتفجئ تلاقي الشيئ اللي انت راكبه ده عبارة عن صفيحة مصدية زي صفيحة الزبالة بالظبط – ودي قبل ما يخترعوا السلة البلاستيك – أو يبقى زي قطار العياط او قطار الصعيد أو قطار قليوب أو قطار كذا وكذا من الحوادث اللي أخدت أسامي المحطات ، وطبعاً كلنا فاكرين حملة الإعلانات اللي اتصرف عليها ملايين من فلوسنا وقالو اتجددت وبقت امان وفي النهاية نلاقيها هي هي بنفس عفونتها وحوادثها ، وعلى رأي احد الأصدقاء القطر اللي على حق ياخدك لدار الحق !!

المواطن المصري هو المواطن اللي بيشرب من مية النيل ، بس استنى خلي بالك مش بس مية النيل زي ما كان بيتقال ، وانما مية النيل المخلوطة بمياة الصرف الصحي او المية المليانة منجنيز وكلور ، او المية الطبيعية اللي بتيجي من النيل على حنفيتك عدل بدون اي تكرير او تصفية لحد ما جالنا الفشل الكلوي والتيفود وفيروس سي ، وكمان مش بس كدة أكلك يا مواطن مليان بلاوي زرقا بداية من ريه بالصرف الصحي – سبحان الله احنا والزرع بنشرب منها – واللي بيترتب عليها امراض عدة زي ما ظهر التيفود في البرادعة وقرى كتير وصل ليها الإعلام غير اللي بيتكتم عليه ومبيوصلش للإعلام نهاية الى الخضار المسرطن اللي استوردناه من اسرائيل ..

المواطن المصري هو اللي بيمشي على الأسفلت في الضلمة وهو بينطق الشهاداتين ، لأنه فجأة ممكن يلاقي نفسه في عداد الاموات ممكن حفرة او مطب او حتة نسيوا يسفلتوها زي ما بينسوا ديماً يولعوا نور العماويد بليل فايقوم اللي سايق يا عيني لابس في اي حاجة ، او نتيجة للأسفلت اللي بيبقى عبارة عن جير ابيض وشوية بلاك اسود والبعيد كل البعد عن المواصفالت العالمية لدرجة انك وانت ماشي بالعربية – حتى لو مظبط زواياك – تبص تلاقي نفسك كأنك ماشي بمركب بلاد تشيلك وبلاد تحطك وتحدف يمين على شمال وانت ودرجة انتباهاك بقى وياللا اهه الأعمار بيد الله كلها ..

المواطن المصري هو الجندي اللي واقف على الحدود مع الكيان الصهيوني – المسمى بإسرائيل- واللي هي في الأصل ارضنا المحتلة واللي فجأة بيلاقي رصاصة قصفت عمره ويموت الشاب اللي عمره لا يتعدى 23 سنة بالكتير برصاصة اسرائيلية غدر ، وتبص تلاقييهم بيقولو في الجرايد انه مات برصاصة خرجت من سلاحه غلط اثناء تنظيفه !!وبالعقل كدة هو فيه حد بينضف سلاحه اثناء خدمته خاصة ولو كان حرس حدود ؟؟ ، واللي يقول اصل رصاصة خرجت غلط من سلاح زميله برضه وهو فيه جندي بيقف على خدمة برج مراقبة على اي نقطة حدودية ومعاه حد ؟؟ او ولو حتى معاه حد اشمعنى دول بس اللي الرصاص بيخرج غلط منهم في اتجاه بعض ؟؟ ، وقليل لما تلاقي خبر صغير اوي يقولك مقتل جندي مصري على الحدود مع اسرائيل برصاص من الجانب الإسرائيلي دون الإشارة انها من جندي اسرائيلي إلا في أضيق الحدود ، او يقولك رصاص من الجانب الفلسطيني عشان يلزقوها في الفلسطينيين وخلاص ماهو مينفعش نقول اسرائيليين ، عشان حرام ، بس مش ربنا اللي حرمها وانما اللي حرمها حسني مبارك وأمنه

السؤال بقى هل الجندي ده له كرامة ولا لأ بالرغم من انه بينطبق عليه صفات المواطن المصري الحقيقي بل يزيد عليه انهم بيبقو فلاحيين يعني من اللي خيرهم علينا وبناكل من خيرهم ، هل ده يستحق اننا نقف ونطالب بكرامته ونعمل ثورات ولا لأ ؟؟

وهل اسرائيل لما بتقتل الجنود بتوعنا اللي واقفين خدمة على الحدود هل ده ميستحقش اننا نطالب بكرامتنا اللي دهسوها دي ؟؟ ملحوظة احد الجنود ذكر ان الجنود والمجندات الإسرائيليين بيقوموا بأعمال منافية للآداب- زنا يعني – قدام الجنود المصريين اللي واقفين خدمة عشان يستفزوهم ، هل بقى ده يستحق الكرامة ولا لأ ؟ وهل نقدر نعمل مظاهرة نطالب فيها بطرد السفير عند السفارة الإسرائيلية حتى أو حرقها زي ما بيحصل دلوقتي مع سفارة الجزائر ؟ اتحداكم

هل اسرائيل دولة شقيقة لدرجة اننا منقدرش نطالب حتى بدم شهدائنا دول ؟ في الوقت اللي قومنا الحرب فيه عشان خاطر اعتداء بعض المشجعين الجزائريين على الكريم شانتيه بتاع مجتمعنا واللي عمر ما حد فيهم شاف معناة المواطن المصري الحقيقي واللي منهم مسولين عن معناة المواطن المصري بجد ؟

هل ضحايا التعذيب في اقسام الشرطة واللي منهم كتير بيموت اثناء التعذيب يستحق اننا نثأر لهم ونطالب بكرامتهم ولا لأ ؟

هل ضحايا قطار العياط والقطارات اللي على حق يستحقوا اننا نطالب بكرامتهم ونطالب بكرامة حقيقية لينا وبمواصلات نضيفة وآمنة ولا لأ ؟

ولو كان لك أخت او كنتي بنت وبتقري الكلام ده هل من حقك او من حقك اختك ان تركب مواصلة دون تحرش او دعك ولا لأ ؟ وهل من حقنا اننا نطالب بكرامتنا وكرامتها ولا ملناش ؟

كفاية كدة انهاردة ونكمل بكرة وهاقولكم مين اللي كسب في العملية دي كلها وخلاصة الفيلم ده واللي اشترك فيه الجاهل والمثقف بكل جهل ..

يا الله أنت الله ولا إله غيرك وانت القادر على كل شيئ أوقف الفتنة بيننا وارفعها من بيننا وأرنا الحق حق وارزقنا اتباعه وارنا الباطل باطل وارزقنا اجتنابه فأنت خالق الكون والقادر على كل شيئ ... صلوا و ادعوا ربنا كشف الغمة ورفع الفتنة