الثلاثاء، سبتمبر 11

محدش يقولي كل سنة وانت طيب ومش هاقول لحد كل سنة وانت طيب

اولاً التدوينة دي هاكتبها بالعامية الباحتة


ثانياً والاهم محدش يقولي كل سنة وانت طيب ولا انا هاقول لحد كل سنة وانت طيب
متبصليش كدة مش هاقبلها من حد ولا هاقولها لحد
وانا ليا اسبابي لإعلاني هذا
الناس بتهني بعض برمضان لما تحس ان فيه رمضان فعلاً وتحس بفرحة رمضان وتسمع اغاني رمضان وتشوف افران الكنافة في الشوارع وتشوف أشولة البلح أمام المحلات والزبيب والتين المجفف والمشمش المجفف الخ الخ من الحاجات دي
وكمان الفوانيس اللي بتتعلق في الشوارع وفي البيوت والمداخل الحاجات اللي انا ذكرتها دي مبشرات ومقدمات لرمضان
السنادي بقى مش حاجة غير 4 حاجات ومش من المذكورين
اولاً : غلاء فظيع في كل الأسعار

ثانياً : دخلة المدارس ورمضان مع بعض

ثالثاً : التليفزيون وبرامجه واغانيه وأفلامه بتاع اليومين دول

رابعاً واخيراً آثار الحاجات دي كلها على الناس

بصراحة يا جماعة انا مش شايف رمضان ومش حاسس بفرحة رمضان لا في قلبي او في ملامحي ولا في ملامح او قلوب الناس
الدنيا خنقة كيلو البلح اللي يتاكل يعمل حوالي 8 او 7 جنيه ودي البدايات واصل لحد فوق فوق اوي سمعت سعر 40 جنيه يعني ابقو قابلوني لو حاد جاب بلحة وكمان الدقيق الي بيتعمل منه العيش والكنافة ومعظم ما ناكل وصل 3جنيه وربع يعني انسو اي حاجة من اللي كانت بتتعمل وكمان رغيف العيش كش وصغر يعني اللي هاياكل علشان يشبع مش هايكفيه بجنيه عيش لوحده اه وعلى فكرة انا بتكلم عن العيش الحقيقي اللي نسبة التراب والرمل فيه قليلة شوية اللي هو ب20 قرش قصدي اللي كان بـ20 قرش وبقى بربع جنيه من حوالي يومين
وطبعاً مش الحاجات دي بس اللي غليت ده كل حاجة غليت حتى كمان هايغلو النت
لأ وايه ده فيه مفجأة رمضان جاي هو والمدارس في اسبوع واحد مشفتوش الخيبة التقيلة الناس بتصوت من دخلة المدارس لوحدها رمضان جاي هو كمان معاها ولا فيه اعانات من الحكومة بنت ال×× للشعب والموظفين ولا اي حاجة لأ دي رفعتلهم الأسعار افرحوا يا ولاد
طبعاً هالاقي أخ مؤمن جاي يقولي حرام عليك يا أخي حرام عليك تقول كدة هاقوم شاتمه على طول رغم اني مش شتام ولا بحب الشتامين حرام ايه يا اخونا هو انتو معندكوش وصلة ولا ايه ؟؟ مبتشوفوش الأفلام والأغاني ولا قنوات روتانا ولا ميلودي ولا ايه ؟؟
دي القنوات بقت حاجة فل وعال العال دي بقى اوسخ من قنوات الأجانب بقو عرايا وعلى عينك يا تاجر في القهاوي وفي البيوت وفي كل مكان شغالين الله ينور والبانجو والمخدرات والحشيش يعني مفيش اكتر منهم في الشوارع بين ايدين الناس بمختلف اعمارهم وجاي تقولي حرام عليا اللي انا بقوله يا اخي جتك نيلة
كل الحاجات دي بقى مأثرة على الناس يبى بالذمة فين الطيبة ؟
اقولهم ويقولولي كل سنة وانت طيب ليه وعلى ايه ؟
شفتو المعجزة مبارك هو كمان ما ماتش يعني كابس على انفاس الجميع حتى يكتم انفاسكم في صدوركم وانتم لا تحركون اي ساكن

بتكلم بجد ولله هل وسط كل ده هايجيلك او يجيلي قلب نقولها لبعض ؟
انا عن نفسي خلاص عزمت على فعل شيئ اني مش هاهني حد بأي مناسبة غير لما مبارك يموت لأن الراجل ده هو السبب في كل اللي احنا فيه غلاء هو السبب
دخول رمضان والمدارس مع بعض والزنقة هو السبب بسبب سياسة افقار الفقير وإغناء الغني أكثر وأكثر
فساد اخلاقي وترويج لكل المفسدات هو برضه السبب
ومن الآخر انا هاعمل زي الصعايدة في حكاية التار مش هاقبل العزا اللي هي التهاني غير لما ناخد بتارنا

ومش آسف على التطويل اسمعوني زي ما بتسمعو الكلام الفارغ االلي انا بقوله ده مش من دماغي ولا مألفه ده واقع عايشينه ومكتومين ومش قادرين نتكلم

حسبي الله ونعم الوكيل فيك يا ظالم انت وحزبك وحكومتك وكل مؤيديك ومؤيدين مؤيديك داهية تاخدكو جميعاً في يوم واحد

على فكرة يا جماعة اللي خلص دي يدخل على دي اضـغـط هـنـا


4 التعليقات:

مواطن زهقان يقول...

بجد يامحمود
مش عارف اقولك ايه
انا اول ماقريت العنوان قلت ايه دا محمود بيقول ايه
فلما قريت البوست
اعلنا زيك

محدش يقولى كل سنة وانت طيب
ولو حد قالهالى مش هرد عليها

مدونه انا بحبك يا مصر يقول...

مش هقولك خلاص كل سنه وانت طيب
بس هقولك كفارة يا زعيم
قعت تقلى هتتحبس هتتحبس اهو انت الى اتحبست ههههههههههههه يا وهابى ههههه
كفارة يا ريس
احمد الجيزاوى

Moslma-N يقول...

بلاش كل سنة و انت طيب
و بعدين رمضان كريم و ربنا بيسترها متزعلش نفسك , الناس فرحانة و راضية بكده و لو زغلنين بجد مكنوش سكتوا على المهزلة دى
كل عام و انت الى الله اقرب و من الشيطان ابعد و على الطاعة ادوم
و على موبيلك و كارت الممورى محافظ

حمادة زيدان يقول...

والله أنا أول مرة أدخل مدونتك , بس مدونتك جميلة جداً وشكلها شيك جداً , وتسلم عالتقرير , وربنا يقدركم على التقارير دي , وعقبال ما نجيب تقرير عن ظهور أى تقدم في الشارع المصري
حمادة زيدان

إرسال تعليق

علق ومتنساش تدخل على مدونتي التانية حنظلة
http://7anzala.wordpress.com