الخميس، يناير 17

انا مش مدون ولا احب ان اكون مدون

انا مش مدون
ايوة مش مدون ولا هاكون مدون ولا عايز يتقال عليا مدون
بصراحة مش عارف ايه حكاية كلمة مدون دي ؟؟؟!!!
ناس كتير جلها هوس اسمه مدون او مدونة ، واصبح كتير يقولوا على نفسهم بإفتخار ويقوم قاعد مجعوص اوي وفاردها كدة ويقولك انا مدون
ياخي جتك خيبة قوالب
يعني ايه يعني مدون يعني وظيفة عالية يعني ذو سلطة مثلاً والناس بتشوفك في الشارع تجري يعني ولا يمكن مدون دي بيكون معاك توكيل من الرب تفعل ما تشاء ماهو انت مدون بقى
ولا الناس اللي تسألها عن اسمها يقولك قبل اسمه المدون كذا كذا او اللي يقولك اسمي كذا .. طب شغال ايه يا سيدي ؟ يرد وهو بيبتسم ويميل راسه بجنب كدة ويهزها ( يهز راسه مش حاجة تانية ) ويقول بسوط منخفض ( مدون ) ياعيني
طيب هو ليه كل ده ؟ لازمتها ايه يعني نعمل كدة في نفسنا ؟
هانضحك علينا الأجانب مش كفاية اللي بتعمله الحكومة فينا
اولاً هو ايه التدوين ده ؟
من وجهة نظري ان التدوين نعمة ونعمة كبيرة كمان لأنك من خلاله بتقدر على الأقل تسمع صوتك للناس وبتقدر تفضفض زي ما انت عايز في اي ناحية من نواحي حياتك حتى لو كانت تييييت يعني مساحة حرة للكلام ببلاش معمولة للفضفضة وتقول فيها كلامك اي كان سواء يوميات او خواطر او حتى اخبار او حاجات بتشوفها وبتقول فيها رأيك يعني مش وظيفة او منصب من مناصب الوجاهه يعني ولا حتى بتتميز عن الآخرين في شيئ ايوة مفيش تميز ممكن تدون على ورق زي ما ناس كتير بتعمل او تكتب على الحيطة او ابواب الحمامات في الجوامع والكليات وكذلك على كراسي المواصلات خاصة الميكروباصات وكمان الفلاحين في الغيطان بيدونو على الأرض ساعة العصاري بالعصاية يعني كل الناس بتدون ايه اللي بيميز بقى اللي بيفتخر بكلمة مدون دي
النت يعني وانه بيوصل للناس ؟ قديمة مدونين الأوتوبيسات ابواب الحمامات صوتهم وصل قبلك ومنتشر اكتر منك يعني هما الأحق بلقب مدون ان كانت لقب ولا وجاهة
ده هو التدوين يعني ارحمونا بقى مش عايز اسمع حد يقول كلمة مدون دي في وشي بتنرفزني
وانا مش مدون رغم ان عندي 3 مدونات اتنين معروفين انهم بتوعي وواحدة سرية وبشرع في عمل الرابعة وهاتكون خاصة بالصور بس وبرضه مش هاقول على نفسي مدون ولا عايز حد يقول عليا مدون انا بريئ من هذا اللقب ان كان لقب

معاه حق حسام الهندي لما قالي انه مبيحبش حد يقول عليه مدون