الجمعة، سبتمبر 12

احنا مش زبالة يا نظام زبالة

احنا مش زبالة يا نظام زبالة


خبر غريب وعجيب وصحيح اتنشر في جريدة البديل يوم الخميس عن ان الحكومة اللي هي عبارة عن جزمة في رجل مبارك ناوية انها تسوي منطقة الدويقة المنكوبة بالأرض ومنطقة الدويقة دي حصل فيها انهيار صخري على المنطقة السكنية واندفن تحت الأنقاض اكتر من 400 جثة غير اللي تم انتشالهم وغير الإصابات ، والحكومة بقى بتقول ان تكاليف انتشال بقية الجثث عالية وعددهم يفوق الـ400 جثة لذلك ناوية تردم عليهم ( أو ناوية تردم على الموضوع الله أعلم ) ، طيب ده معناه ايه ؟؟ اللي هايحصل ده معناه اننا عند مبارك وحكومته عبارة عن شوية زبالة ، طبعاً هما بيعتبرونا كدة من زمان لكن اللي حصل في الكام سنة الأخيرة دي ومازال بيحصل بقى شيئ لا يطاق
العبارة ( السلام 98 ) اللي غرق فيها اكتر من 1000 انسان وتم تهريب ممدوح اسماعيل صاحبها وتم سلق القضية واتكلفتت واتكروتت واتحولت لجنحة ( كأنه شتم واحد ) بدل ما المفروض تبقى جناية لأنها قتل عمد لأن العبارة غير صالحة لإحتمال مثل هذا العدد الى جانب ان وسائل الأمان فيها غير صالحة الى جانب ان حين الإستغاثة لم يحرك ساكناً وسابها تغرق عشان التأمين والتعويضات اللي هايخدها من شركات التأمين ، وطبعاً سلقوا القضية وهرب ممدوح بيه اسماعيل وخد براءة بحكم محكمة وده بيفكرك كانك ماشي بمركب في البحر لقيت شوية زبالة قمت راميهم في البحر وكأن شيئ لم يحدث !!
ولما قبلها قطار الصعيد اللي ولع ومات فيه المئات وده بسبب ان القطارات غير صالحة لأن تكون صفايح زبالة اساساً ومع ذلك ماشية وشغالة على السكك الحديد اللي يولع واللي يخرج من قضبانه يمشي وسط البيوت ويدخل على الناس بيوتهم واللي ميقفش ويلبس فأخوه وهيصة برضه كل ده بيحصل ومحدش سأل وكأن اللي بيركب القطارات دي شوية زبالة لميناهم وبنحرقهم ولو حد اشتكى من الدخان هانقوله معلشي !!
ولا اللي بيتقتلوا برصاص الصهاينة على الحدود اللي كأنهم كلاب ضالة بينضربوا بالرصاص ملهمش لازمة ، ولا المصريين اللي بيتبهدلوا في بلاد الناس بره ومحدش سائل فيهم ولا بيجبلهم حقوهم ماهما في نظر حكومتهم شوية كلاب او شوية زبالة ملهمش لازمة
هاعد ايه ولا ايه
المترو مترو الإنفاق اللي بقى عامل زي العربية الرمسيس ( نوع من العربيات القديمة اوي ) كنا الاول بنشتكي من الزحمة اللي فيه وشوية وقلنا الخدمة بقت زفت والتكييف مبيشتغلش والدنيا بتبقى حر دلوقتي بقى بنقول يارب عايزيه حر وزحمة ومقرف بس يقف بينا لأن المترو دلوقتي بقى مفيهوش فرامل لله الله على الإنجازات العرة ، طب ده يرضي مين يا شعب ؟
بلاش الكوارث دي حد فكرة في المية اللي بيشربها انها مية وسخة ( وآسف اني قولت وسخة ومقولتش ملوثة لكن ده وصفها الحقيقي ) متعرفش ان كانت بتيجي لك من النيل للحنفية على طول ولا بيزودوها مجاري في بعض الأحيان ولا ان كانت بتجيلك اصلاً ومع ذلك بتجيلك الفاتورة تقطع النفس ، والعيش الي بناكله اللي عامل زي المخدرات اللي يجيبه اما انه يجيبه بخناقة او بواسطة وبالعافية ولو جايه مش هايسلم من الأذى لأنه رغيف العيش في مصر اتغير اسمه بقى اسمه الرغيف السام لأنه بيبقى مكون من كمية من التراب وكمية قليلة جداً من الدقيق المسرطن وكمية اخرى من المعادن مثل المسامير والرصاص ومعادن ثقيلة تفيد في التخلص من الزيادة السكانية ياله واهه اللي بيموتو من العيش والمية دول شوية كلاب عايزين نخلص منهم ولا لهم لازمة !!
طب فاضل ايه ؟؟
الهوا اللي بتنتفسه مبارك وحكومته حالفين طلاق تلاتة لا يبوظوه هو كمان واللي يلاقو عنده حتة أرض خضرا او منطقة على البحر يخترعوله اختراع اسود ويبنو فيه مصنع زي مصنع اجريوم اللي عايزين يبنوه في دمياط عشان الدمايطة واللي في البلاد اللي حواليها يتسممو في بدنهم وينفسوا سم هاري يهري الرئتين وكل ما يمر عليه !!!
سيبك من كل ده
حد فيكم زعل الباشا قبل كدة ؟
ينهار ابوكم اسود
بقى مش عارفين مين الباشا ؟ الباشا ده يا مواطن يبقى الباشا الظابط اللي لو حد زعله او حد قاله غلطة لسان يا بيه وهو باشا يبقى امه داعية عليه ولا لو اتجرات كدة وعملت فيها بني آدم قولتله لأ مش من حقك تقبض عليا وهو بيقولك اركب على البوكس وانت ماشي في حالك في الشارع ينهار اسود على اللي هايحصلك
هايمسكك يكهربك ويحط السيخ المحمي في ................. صروصور ودنك ومش بعيد حتة تانية لو قليت ادبك ويحطك على الشاحن تتكهرب شوية وغالباً بيلاقي منظرك بقى عرة كلك علامات زرقا ووارم من كتر الضرب فبيحن عليك ويرحمك ويموتك عشان ينقذك من الآلام اللي انت بتعانيها نتيجة لغلطلك شوفت يا مواطن الباشا بيحبك ازاي ومش هاين عليه انه يشوفك بتتعذب وبتتوجع وكمان مبيرضاش يحرق قلب امك عليك فبيقول ان زمايلك البلطجية الوحشين اللي سرقو عشان مش لاقيين شغل هما اللي ضربوك وانك انتحرت من كتر الزهق فأهلك يقولو الواد ابننا ده واد كافر مات منتحر ياله كلب وراح !!
كل ده نتيجة اننا في نظرهم شوية كلاب او شوية زبالة او اتنين مع بعض يعني احنا كلنا في نظر نظام مبارك عبارة عن شوية زبالة ملهاش لازمة اما لو كان فيها حد برجوازي شوية ومعاه قرشين ده بيعتبروه كلب ممكن يرموله لقمة ياكلها اما الباقي زبالة ملهاش لازمة يحرقوها لما يحبو يدفوا او يرموها في البحر لما المركب تتقل وتميل عشان متغرقش ، او انهم يسيبوها تنداس بالجزم زي ما بيحصل فينا بره

لأ يا نظام زبالة احنا مش زبالة
يا ناس احنا مش شوية زبالة يتردم علينا ونسكت
يا ناس احنا مش شوية زبالة نترمي في البحر ولا يولعو فينا ونسكت
اصحو يا خلق قبل ما يجي عليكو الدور
واههي الدايرة بتلف وشغالة على الكل لا اللي مسافر برة سالم منها ولا اللي قاعد فيها ، لا اللي قاعد جنب الحيط وملوش دعوة بالسياسة نجي ولا اللي بيتكلم في السياسة وبيطلب حقه مات الكل سواء وكله محصل بعضه
ان ممتش بالسبب الاول هايموتوك بالتاني وان ممتش بالتاني هايموتوك بالتالت الخ الخ الخ
بالله عليك يا مواطن ساكت ليه وصابر على ايه ياللي بتشتري كيلو العدس اللي هو اكل الفقير بـ16 جنيه يعني لو جبته مش هاتلاقي تاكله بعيش عشان مش هاتعرف تجيب العيش وخد بالك لو كملت الوجبة وجيبت العيش انتظر المسمار اللي هايخرم معدتك اللي بيبقى موجود في الرغيف ، سيبك من كل ده انت هاتموت هاتموت من المية الوسخة اللي بتشربها او الهوا المدخن اللي بيدخل في نغاشيشك يا مواطن يا ساكت يا خايف يا للي الحكومة بتقول عليك زبالة
أصحى بقى يا أخي قبل ما تتنيل تموت

4 التعليقات:

نبيلة غنيم يقول...

مأساه بكل المقاييس
حسبنا الله ونعم الوكيل

رمضان كريم يا ششتاوى

حسن مدني يقول...

يا عزيزي
إحنا مش زبالة، الزبالة يمكن إعادة تدويرها أو بيعها.
النظام يتعامل معنا باعتبارنا آفات ضارة يجب إبادتها.

واحنا ساكتين...

حسبنا الله ونعم الوكيل.

غير معرف يقول...

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:

http://www.ouregypt.us/culture/main.html

اتحاد المدونين المصريين يقول...

يدعوكم اتحاد المدونين المصريين الى مساندة ودعم زميلنا العزيز

الاستاذ

خالد الصاوى

صاحب مدونة

منارة العرب

فى محنته المرضية التى يمر بها ..

لمزيد من التفاصيل برجاء زيارة مدونة الاتحاد

إرسال تعليق

علق ومتنساش تدخل على مدونتي التانية حنظلة
http://7anzala.wordpress.com