الثلاثاء، أكتوبر 5

الله الله يا بدوي جبت ضرفها


تعبيرية طبعاً .. اضغط عليها عشان تكبرها


بصراحة مش عارف ابدأ ازاي ، من كام يوم كنت بتكلم مع السيدة ن وجت سيرة ابراهيم عيسى قالتلي انه اتشال من اون تي في وانه في الطريق انه يتشال من الدستور ، طبعاً انا صدقت النص الأولاني وفضلت انتظر النص التاني لكن مكنتش اتوقع انه يبقى بالسرعة الرهيبة دي ..سي السيد ماشي على الخطة تمام وفي سرعة ثابتة ، في البداية دخل على رئاسة حزب الوفد وفجاة وبدون سابق انذار لقيت الوفد اتفتحت عليه من وسع وكل يوم ألاقي شخصية شكل دخلت حزب الوفد ، تلاقي الأبلة المذيعة وتلاقي سيدنا الشيخ وكمان ستنا الشيخة وطبعاً مننساش طنط الممثلة الفنانة الخ الخ من الناس والعينات اللي دخلت حزب الوفد ..في البداية انا قلقت على حسني مبارك وقولت في نفسي هو فيه ايه الناس كلها داخلة حزب الوفد ليه ، يكونش الوفد قام بالثورة واحنا منعرفش وبقى هو الحزب الحاكم ؟ ، لكن بالتدقيق في قراءة الصحف الحكومية والمستقلة والمعارضة لقيت ان كل شيئ زي ما هو وحسني مبارك قاعد على قلوبنا والحزب الوطني كابس على انفاسنا ..امال فيه ايه يا عالم الناس دي داخلة الوفد ليه ؟ ، قالك خير اللهم اجعله خير سي السيد بقى الريس!! ينهار اغبر بتقول مين بقى ريس ؟ سي السيد ؟! ، يا جدع انت مغفل ؟ انا بقصد سي السيد بقى رئيس حزب الوفد ، ودخل سي السيد على الرئاسة ومسك الوفد هاتك يا تأييف ويا تظبييط ويا تضييق ويا كشكشة لحد ما خلى الوفد بقى أمينة بتاع السوارس وخلصت حكاية الوفد واستقر الوفد بدون النزاع على رئاسة الحزب وبدون خناقات وبدون احراق لمقرات وبدون الحاجات اللي بتحصل في الأحزاب اللي فيها ناس قلالات الأدب مبيسمعوش كلام بابا حسني والبركة في سي السيد ابو اشارة خضرة ..
خلصت حكاية الوفد اجري يا ايام وعدي يا ساعات واقفي يا اسابيع وهوب لقينا سي السيد دخل عالدستور عشان يشتريه ، نهار اسود يشتري الدستور ازاي ؟ ياعم متبقاش غبي ، يشتري جرنال الدستور مش يشتري الدستور ابو قوانين هو اه متأيف هو كمان لكن مش كل حاجة متأيفة يبقى ياخدها سي السيد ..أشترى سي السيد الدستور والكل مسك قلبه بإيده هل يا ترى هايستمر الدستور زي ما اتعودنا عليه ولا هايتغير ؟ اجري يا ايام ومتجريش كتير وهوب طلع علينا سي السيد بتقليعته الجديدة وخلع ابراهيم عيسى عمدة الدستور من الدستور وصبحت الدستور من غير عمدة وجابوا عمدة آلي بيحركه سي السيد بزراير وحطوه مكان العمدة الحقيقي وقامت البلد كلها مظاهرات واعتصامات وقعدو يقولو مش عايزين غير عمدتنا مش عايزين العمدة الآلي ، لحد ما راح شيخ البلد الجديد حاول يهدي الأهالي معرفش فقام زعق في الأهالي وقالهم العمدة مش هايجي تاني ولو هاييجي مش هايبقى عمدة وهايبقى غفير !! ، وقبل ما يمشي شيخ البلد الجديد اللي جاي بأوامر سي السيد قام مِقَّلِب دوار العمدة وساب الاهالي معتصمين في الدوار وقالهم اضربو دماغكو في الحيط ..وبكدة قام سي السيد الهمام بدوره المظبوط التمام ونيم الكل وعممهم والبركة في الإشارة الخضرة اللي بيها نفذ سي السيد خطته وخلى حزب الوفد بقى أمينة ، واشترى الدستور وطير ابراهيم عيسى من الدستور عشان يخلي الدستور جرنال بيتكلم بلسان سعادته ، ومن اشرس جريدة معارضة لمجرد جريدة تعبيرية ..
وتوتا توتا خلصت الحدوتة حلوة ولا ملتوتة ؟؟

1 التعليقات:

high_staff يقول...

سي السيد جاي في مهمه ولازم يخلصها بسرعه قبل الانتخابات ما تبدا وخد المعلومه التانيه عمك عبد الله كمال قال بصريح العباره فيما يخص المصري اليوم نهايتها مع نهايه 2012
اقرا كلامه بالظبط وحاول تفهم مع العلم انه كتب المقال دا قبل الاحداث دي
" قلت من قبل في برنامج «مانشيت» إن مواقف صحفيين وإعلاميين في الإعلام الخاص لن تكون في نهاية 2010 كما كانت في نهاية 2005.. وقد ربطت توقعي هذا بأمور مختلفة.. وقلت إن تحولات المواقف سوف تقود إلي متغيرات خلال 2011 تؤدي في النهاية إلي اختفاء جريدة المصري اليوم في 2012.. وحتي الآن وربما إلي منتصف ليلة السبت/ الأحد يتساءل البعض في المصري اليوم عما أستند إليه في توقعي ويجرون الاتصالات لكي يعرفوا ما هو المقصود.
ولكي نلبي بعض فضولهم نقول إن ما يجري وسيجري في الدستور سوف يقود بالتأكيد إلي بعض حقائق توقعي.. ولو بقيت كل الأطراف كما هي في مواقعها.. بدون أي تغيير.. ذلك أن بقاء الأطراف مزيدًا من الوقت في نفس المواقع لا يعني علي الإطلاق أنها سوف تلتزم بما هو معروف عنها بعد حدوث المتغيرات.. فالمواقع يحدث فيها تغيير نوعي ومضموني حين تتغير مواصفاتها".

إرسال تعليق

علق ومتنساش تدخل على مدونتي التانية حنظلة
http://7anzala.wordpress.com