السبت، مارس 26

بالصور : حقيقة صفحة الفيس بوك التي يديرها ظباط أمن الدولة

فيه صفحة على الفيس بوك إسمها " ضباط الشرطة الشرفاء من أبناء الوطن " الصفحة دي أنا مشترك فيها من فترة ، الصفحة دي عبارة عن صفحة عاملها ظباط من اسكندرية ، وكنا بنظن ان اللي عامل الضفحة دي ظباط شرفاء كما يقول الإسم لكن مؤخراً أكتشفت ان الصفحة دي اللي بيديرها تقريباً ظباط تابعين لبقايا جهاز أمن الدولة – اللي المفروض انه اتلغى – ومازال ولاؤهم للنظام القديم وبيحاولوا يشوهوا الثورة والثوار بأي طريقة ..

من كام ساعة لاحظت ان الصفحة دي عاملة شير للينك عنوانه " المخطط الكامل من البدايه للنهايه لسقوط مصر بالادله " ، اللينك ده عبارة عن موضوع على مدونة وواضح جداً ان الموضوع متفبرك لتشويه الثورة والثوار ، مختصره بيقول ان اللي بيقود الثورة دي هو العقيد عمر عفيفي الظابط اللي عايش في أمريكا ، وانه مدرب ناس وبيمولهم عشان يسقط النظام ، وانه مقسمهم مجموعتين مجموعة سلمية ومجموعة تخريبية تمهيداً لإحتلال مصر وقصة كبيرة وهابلة تقدروا تطلعوا على تفاصيلها بالضغط على اللينك المرفق في الأسفل ، انا دخلت قريت الحوار استغربت ان اللي يعمله شير الصفحة دي اللي المفروض انهم بيقولوا انهم شرفاء ومع الثورة والأفلام الهندي واللي طلعت كدب دي ، واللينك معمول له شير بدون تعليق ، وبعد ما دخلت وعلقت على الحوار ده وهاجمتهم ، لقيتهم بيأكدوا انهم مبيرفعوش اخبار ولا بينشروها الا لما يكونو متأكدين منها ، وانهم بيفتحوا عيون الأعضاء وشوية كلام كدة من نوعية السوس اللي بينخر ونظرية المؤامرة الهابلة اللي من وراها عايزين يشوهوا صورة الثورة ويقولوا ان اللي عاملها عملاء لتضييع الوطن واحتلاله والفيلم البايخ ده ، وفي أحد ردوده ليا أكدلي انه هو الأدمن المدني مش أحد الظباط ، وبقية الحوار هتلاقوه كامل في الصور تقرأوه بعناية وتشوفو بنفسكم ..

طبعاً انا انفعلت جداً وشتمتهم – وهتلاقوا ده برضه في الصور – لكن ربنا ألهمني اني اني اخد برينت سكرين للصفحة دي والحوارات اللي عليها والملحوظات اللي لاحظتها عليها في ذلك الوقت لأجد المفجأة وهي ان الأدمن اللي كان بيأكدلي انه هو الأدمن المدني يطلع أحد الظباط ، واكتشف ان الأدمن المدني تم إزالته من الصفحة وانه تم وقف الأكونت بتاعه نفسه أساساً وده ان دل فيدل ان الصفحة دي مش بيديرها اتنين أدمن باتنين اكونت كما نظن وانما يديرها واحد او مجموعة بالأكونتين في وقت واحد وبيشتغلونا بفيلم ادمن مدني وادمن ظابط ..

الخلاصة اللي اكتشفتها عشان مرغيش كتير هي ان الصفحة دي كانت شبه فخ كدة او كانت صفحة لتحسين صورة ظباط الشرطة وبعد ما الناس تثق فيها يبدأوا في دس السم في العسل ويروجوا لأخبار ومعلومات من شأنها تشويه الثورة والثوار وتظهرهم بمظهر العملاء الممولين من الخارج ، كمان لاحظت ان الصفحة دي كانوا عاملين من ضمن صفحهم المفضلة صفحات لتأييد أحمد شفيق رئيس وزراء مبارك السابق ، فيه شيئ مريب ، ودلوقتي هابدأ في عرض الصور مع شرح مبسط لكل صورة ، وفي آخر الموضوع هتلاقوا رابط منه تقدروا تحملوا نسخ للصور دي على جهازكم ، وكمان هتلاقوا صفحتهم ياريت ندخل كلنا نعملها ريبورت ونحذر الناس منها ومن سمومهم اللي بينشروها ..

اضغط على الصورة للتكبير



اول صورة تظهر أول تعليقي ويظهر الإتنين أدمن في الصفحة

صورة تظهر اول ردوده عليا ومازال الأدمن الثاني موجود


هنا بقية ردوده وهتلاحظوا في احد ردوده اللي بين النقطتين الحمر هو بيأكدلي انه هو الأدمن المدني


بعد كشفي لهم وبعد الحوار بياخد رأي اعضاء الصفحة في طردي من الصفحة


لاحظ المفاجأة بقى هنا : وهي ان الأدمن التاني اختفى من الصفحة بعد كشفي لهم


في التعليق ده وهو اثناء الحوار كان بيطلب من احد الأشخاص انه يدخل على أدمن الظابط ويدخل بيه بشكل خفي ، غالباً تبديل وردية
المحلوظة المهمة هنا : المفروض انه هو اللي بيتكلم باستخدام اكونت الأدمن الظابط بعد ازالة الأدمن المدني ، يعني ده شخص واحد او مجموعة بيستخدموا الحسابين وبيخدعوا الناس بفكرة ان هناك ادمن مدني وادمن ظابط



في الصورة دي هنلاقيه بيقول انه الأدمن المدني ، وده قبل الحوار بيني وبينه بقليل


لاحظوا انهم عاملين لايك لصفحة دعم أحمد شفيق !!


هنا ده المفروض انه كان صفحة البروفايل بتاع الأدمن المدني اللي اتشال لكن طبعاً تم ازالته وتم وقف الأكونت زي ما احنا ملاحظين

رابط التدوينة اللي كانوا عاملين ليها شير اللي فيها قصة المؤامرة الخرافية واللي بيقصدوا يشوهوا بيها الثورة
http://waleedbesho.blogspot.com/2011/02/blog-post.html

وده رابط صفحاهم ، وياريت كل الناس تعمل ريبورت للصفحة دي
https://www.facebook.com/ALEXANDRIAPOLICE

وده رابط الملف اللي فيه نسخ الصور كلها
http://www.mediafire.com/?bqpdoha2pebeg8f



0 التعليقات:

إرسال تعليق

علق ومتنساش تدخل على مدونتي التانية حنظلة
http://7anzala.wordpress.com